BMT-nin Baş katibi Aİ ilə Rusiyadan gübrə ixracına qarşı sanksiyaların ləğvini müzakirə edir
BMT-nin Baş katibi Antonio Quterriş keçən həftə Aİ liderləri ilə Rusiyanın gübrə ixracına qarşı sanksiyaların ləğvi ilə bağlı danışdığını bildirib.
"Kommersant" xəbər verir ki, Baş katibin sözlərinə görə, bir neçə ölkə, o cümlədən Niderland, Finlandiya, Belçika, Almaniya məhdudiyyətləri aradan qaldırmaq imkanları barədə düşünür.
"Biz limanlarla da əlaqə saxlayırıq. Biz Rotterdamdan, Finlandiyanın Kotka limanından müsbət məlumatlar almışıq. Biz Antverpen və Hamburqla da müzakirələr aparırıq. Ona görə də biz bu problemə çox diqqətliyik və onun həllinə çox sadiqik", - deyib.
Sentyabrın 16-da Rusiya prezidenti Vladimir Putin BMT Baş katibinə müraciət edərək xahiş edib ki, Avropa Komissiyasından inkişaf etməkdə olan ölkələr üçün Rusiya gübrələrinə qoyulan məhdudiyyətləri aradan qaldırmağı tələb etsin. O, həmçinin Avropa limanlarında toplanmış 300 min ton Rusiya gübrəsini inkişaf etməkdə olan ölkələrə təhvil verəcəyini vəd edib.
Formal olaraq, sanksiyalar Rusiya taxılının və gübrələrinin satışını məhdudlaşdırmır, lakin məhdudiyyətlər xammal və malların dəniz daşınmasına təsir göstərir. Qazın qiymətinin artması səbəbindən bir çox Avropa ölkələrində gübrə istehsalı demək olar ki, 30% dayanıb. Onların arasında Almaniya, Böyük Britaniya və Norveç də var.
“Seanews.az”
