Yeddi ölkə Aİ-dən gəmiçilik sənayesinə emissiya vergisini təxirə salmağı xahiş edir
Yunanıstan, Kipr, İtaliya, İspaniya, Malta, Portuqaliya və Xorvatiya hökumətləri Aİ-yə birgə müraciətlərində İstixana Qazları Emissiyalarının Ticarət Sisteminin gəmiçilik sənayesinə tətbiqinə dair qərarın qüvvəyə minməsinin təxirə salınmasını xahiş ediblər.
“Seanews.az” xəbər verir ki, bu barədə “FT” yazır. Məktubda bildirilir ki, bu tədbir yüklərin Avropa limanlarından xaricə çıxmasına səbəb olacaq. Perspektivli benefisiarlar arasında Mərakeşin Tanjer Med və Misirin Port Səid limanları var.
2024-cü ilin əvvəlindən gəmiçilik şirkətlərindən Aİ limanlarında bayraqdan asılı olmayaraq ümumi tonajı 5 min tondan çox olan gəmilər üçün istixana qazı emissiyası kvotası alması tələb olunacaq. Kvotalar Aİ daxilində marşrutlar üzrə emissiyaları 100%, Aİ hüdudlarından kənarda başlayan və ya bitən səfərlərdə isə 50% əhatə etməlidir. Sistem mərhələlərlə tətbiq olunacaq: 2024-cü ildə operatorlar emissiyaların 40%-ni, 2025-ci ildə 70%-ni, 2026-cı ildən isə 100%-ni ödəməli olacaqlar. Həmçinin, 2026-cı ilin əvvəlindən karbon qazı emissiyaları üçün kvotalara azot oksidi və metan emissiyaları üçün kvotalar əlavə olunacaq.
Məktubda həmçinin qeyd olunur ki, yüklərin xaricə axını “emissiya vergisi”nin tətbiqinin nəzərdə tutulan effektinin əksi deməkdir: yüklərin Aİ hüdudlarından kənarda yerləşən limanlara yönləndirilməsi ilə daşıma marşrutlarının uzunluğunun artırılması, əksinə, emissiyaların həcmini artıracaq.
