Norveç kruiz gəmilərinə məhdudiyyətlər qoymağı planlaşdırır
Norveç hakimiyyəti dizel mühərrikli kruiz gəmilərinin limanlara girişini qadağan etməyi planlaşdırır.
Bu barədə “Seanews.az” “RİA Novosti”-yə istinadən xəbər verir.
Qadağa ətraf mühitin mühafizəsi siyasətinə uyğun olaraq 2026-cı ildən qüvvəyə minəcək.
"Kruiz gəmiləri hər bir sərnişinə və qət edilən kilometrə görə dünyada ən yüksək emissiya istehsal edir. Bu gəmilər körfəzimizi çirkləndirir", - deyə Norveç Xarici İşlər naziri Espen Bart Eyde bildirib.
Daha əvvəl bildirilmişdi ki, Norveçin “Hurtigruten” kruiz şirkəti 2030-cu ilə qədər sıfır emissiyalı elektrik kruiz gəmisi inşa etməyi planlaşdırır.
“Sea Zero” adlanan layihə ilk olaraq 2022-ci ilin martında elan edilmişdi və o vaxtdan “Hurtigruten” 12 dəniz tərəfdaşı və Norveç tədqiqat institutu SINTEF ilə birlikdə emissiyasız dəniz səyahətini təmin etməyə kömək edə biləcək texnoloji həlləri araşdırır.
