2030-cu ilə qədər Amsterdam limanında kömürün aşırılması dayandırılacaq
2023-cü ildə Amsterdam limanında 63 milyon ton yük aşırılıb ki, bu da 2022-ci illə müqayisədə 20% azdır.
“Seanews.az” xəbər verir ki, Liman idarəsinin hesabatında belə deyilir.
Kömürün aşırılması 48% azalaraq 7,4 milyon tona düşüb. Məlumata görə, buna karbon əsaslı enerji resurslarından asılılığın mərhələli şəkildə azaldılması istiqamətində terminal operatorları ilə birgə görülən tədbirlər səbəb olub. Beləliklə, 2022-ci ilin sonunda kömür terminalının ərazisi digər fəaliyyətlərin - xüsusən də metal qırıntılarının yüklənməsinin həyata keçirilməsi üçün verilib. Keçən il üçüncü kömür terminalı qismən böyük logistika şirkətinin mülkiyyətinə keçib ki, bu da administrasiyanın 2030-cu ilə qədər limanda kömür aşırılmasını dayandırmaq siyasətinə uyğundur.
Həmçinin hesabat dövründə neft məhsullarının işlənməsi 16% azalaraq 28,9 milyon tona düşüb. Bu, qismən Rusiyadan neft məhsullarının idxalına tətbiq edilən sanksiyalar və Niderlanddan Qərbi Afrikaya yüksək kükürdlü yanacağın ixracına qoyulan qadağa ilə bağlıdır.
Limanın 2023-cü il üçün maliyyə hesabatında gəlirin 190,4 milyon avroya qədər artdığı göstərilir. Amsterdam limanının müqavilələrdən əldə etdiyi gəlir 2022-ci ildəki 103,6 milyon avrodan 2023-cü ildə 115,6 milyon avroya yüksəlib ki, bu da artan xalis emissiyaları və davamlı qiymət artımlarını əks etdirir. 2023-cü ildə liman rüsumları 6,2 milyon avro azalaraq 54 milyon avro təşkil edib. 2022-ci illə müqayisədə əməliyyat mənfəəti 39 milyon avro artaraq 75 milyon avroya çatıb. Xalis mənfəət 2022-ci ildəki 44,4 milyon avrodan 2023-cü ilin sonunda 55,1 milyon avroya yüksəlib.
