İsveç Finlandiya körfəzindəki insidentdən sonra Baltik dənizində gəmilərə nəzarəti gücləndirir
İsveç sualtı infrastrukturu qorumaq üçün Baltik dənizində gəmilərə nəzarəti gücləndirəcək.
“Seanews.az” xəbər verir ki, bu barədə İsveçin Sahil Mühafizəsi məlumat yayıb.
“Sahil Mühafizəsi gəmilərin hərəkətinə nəzarəti gücləndirib. Məqsəd, digər məsələlərlə yanaşı, sualtı infrastrukturu qorumaqdır. Sahil Mühafizəsi Hərbi Dəniz Qüvvələri və digər səlahiyyətlilərlə sıx əməkdaşlıq edir”, - deyə məlumatda qeyd olunub.
Bildirilir ki, Sahil Mühafizəsinin əsas vəzifələrindən biri dənizdə müşahidənin aparılması, dəniz mühitinin monitorinqi və digər idarələrə məlumatın verilməsidir.
Xatırladaq ki, keçən il dekabrın 25-də Finlandiya və Estoniya arasında Finlandiya körfəzinin dibi ilə çəkilmiş “EstLink 2” sualtı kabelinin zədələndiyi məlum olub. Finlandiya rəsmiləri hadisədə şübhəli bilinən “Eagle S” tankerini saxlayıblar.
