Süveyş kanalının cənub sektorunda ikitərəfli hərəkəti olan 10 kilometrlik hissə sınaqdan keçirilib
Süveyş kanalının cənub sektorunda 10 km-lik hissədə ikitərəfli gəmi hərəkəti başlanacaq. Bu məqsədlə Acı Göllərin ərazisində 122 km-dən 132 km-ə qədər iki kommersiya gəmisinin – “Fu Xing Hai” və “Suvari Bəy” balkerlərinin keçdiyi əvəzedici kanalın dərinləşdirilməsi və istismar sınağı işləri aparılıb.
“Seanews.az” xəbər verir ki, bunu Süveyş Kanalı İdarəsinin (SCA) rəhbəri Usamə Rabia açıqlamasında deyib.
Uzunluğu 193,3 km, layihə dərinliyi 24 metr olan Süveyş kanalı iki hissədən ibarətdir: Acı Göllərin şimalı və cənubu. 2015-ci ildən 72 kilometrlik şimal hissəsində ikitərəfli hərəkət həyata keçirilir. Kanalın cənub hissəsində marşrutun müəyyən hissələrində gəmilərin hərəkəti birtərəfli olaraq qalır.
Hazırkı bəyanatında Usamə Rabia qeyd edib ki, kanalın cənub sektorunun inkişafı layihəsi kanalın naviqasiya təhlükəsizliyinin artırılmasına töhfə verəcək. Yeni hissənin istismarı ilə əlaqədar ikitərəfli hərəkətin mümkün olduğu marşrutun uzunluğu 82 km-ə çatdırılıb. Layihə kanalın ötürücülüyünü gündə daha 6-8 gəmi artıracaq.
