"Samsung Heavy" üzən nüvə platforması üzrə "Sargent & Lundy" ilə əməkdaşlığa başlayıb
"Samsung Heavy Industries" ABŞ-nin nüvə mühəndisliyi sahəsində ixtisaslaşmış "Sargent & Lundy" şirkəti ilə standartlaşdırılmış üzən kiçik modul reaktor (SMR) platformasının hazırlanmasını sürətləndirmək məqsədilə anlaşma memorandumu imzalayıb.
"Seanews.az" xəbər verir ki, bu əməkdaşlıq "Samsung Heavy"nin üzən SMR proqramını 2025-ci ildə tamamlanmış konseptual dizayn mərhələsindən çıxararaq lisenziyalaşdırma, tikinti planlaşdırılması və kommersiya tətbiqi mərhələsinə keçirməyi hədəfləyir.
Tərəflər konkret bir reaktor texnologiyasına bağlı olmayan, müxtəlif reaktor dizaynlarının inteqrasiyasına imkan verən texnologiyadan asılı olmayan platforma hazırlayacaqlar.
"Samsung Heavy" bildirib ki, bu yanaşma kommunal xidmət şirkətlərinə, hökumətlərə və digər sifarişçilərə üzən enerji layihələri üçün reaktor seçərkən daha geniş seçim imkanı yaradacaq.
Şirkətlər həmçinin stansiyaların standartlaşdırılması, tənzimləyici qurumlardan icazələrin alınması, dənizdə yerləşdirmə strategiyalarının hazırlanması və ABŞ bazarına çıxış istiqamətində də əməkdaşlıq edəcəklər.
