LNG daşıyıcılarında “WindWings” texnologiyası sınaqdan keçiriləcək
“Korean Register”, “HD Hyundai Heavy Industries”, “BAR Technologies” və “Liberian Registry” yeni nəsil LNG daşıyıcılarında iri qanad-yelkənlərin istifadəsini araşdıracaq.
“Seanews.az” xəbər verir ki, tərəflər 15 sentyabrda Banqkokda keçirilən “Gastech 2026” sərgisində bununla bağlı anlaşma memorandumu imzalayıblar.
Layihə çərçivəsində 174 min kubmetr tutumlu LNG daşıyıcısının hazırlanması və gəmidə “BAR Technologies” şirkətinin küləkdən yardımçı hərəkətverici “WindWings” sisteminin quraşdırılması nəzərdən keçirilir.
Araşdırma zamanı texnologiyanın texniki mümkünlüyü, təhlükəsizlik və normativ tələblər, həmçinin yanacaq sərfiyyatı və emissiyaların azaldılması potensialı qiymətləndiriləcək.
“WindWings” böyük sərt yelkənlərdən ibarət sistemdir və külək enerjisindən istifadə etməklə əsas mühərrikin yükünü azaltmağa imkan verir. Layihənin məqsədi texnologiyanın LNG daşıyıcılarında təhlükəsiz və kommersiya baxımından tətbiq imkanlarını müəyyənləşdirməkdir.
