Dənizçilər arasında keçirilən minifutbol turnirinə yekun vurulub
“Azərbaycan Xəzər Dəniz Gəmiçiliyi” QSC-nin (ASCO) struktur idarələrinin əmədaşları arasında Ulu öndər Heydər Əliyevin 100 illiyinə həsr olunmuş minifutbol turniri təşkil edilib.
“Bibiheybət” Gəmi Təmiri Zavodunun futbol meydançasında keçirilən turnirdə Xəzər Dəniz Neft Donanması, “Bibiheybət” Gəmi Təmir Zavodu və “Zığ” Gəmi Təmiri və Tikinisi Zavodunun komandaları ilə yanaşı, “Səbail” Futbol Klubunun Akademiyasının futbolçuları da təmsil olunublar.
Sosial inkişaf və nəqliyyat departamentinin təşkilatçılığı ilə baş tutan yarışın finalında “Səbail” FK-nın Akademiyası ilə “Bibiheybət” Gəmi Təmir Zavodunun komandası üz-üzə gəlib. Gərgin keçən mübarizədə “Səbail” FK-nın Akademiyasının komandası 6:4 hesabı ilə rəqibini üstələyib və qalib adını qazanıb.
Turnirin qalibi diplom və kubokla təltif olunub, həmçinin onlara qiymətli hədiyyələr təqdim edilib.
Ölkəmizdə idmanın inkişafına Ümummilli lider Heydər Əliyev tərəfindən daim xüsusi diqqət və qayğı göstərilib. Məhz, ASCO-da təşkil olunan idman turnirləri də idmanın kütləviliyinin artırılması, gənclər arasında sağlam həyat tərzinin təbliği yönündə aparılan fəal dövlət siyasətinə dəstək məqsədi daşıyır.
