Odessa Limanında xarici gəmilər üçün ödənişlər avro ilə aparılacaq
Seanews.az xəbər verir ki, Ukraynanın Qara dəniz sahilində yerləşən əsas ticarət mərkəzlərindən biri olan Odessa Dəniz Ticarət Limanı (G.P. “OMTP”) 2025-ci il avqustun 1-dən etibarən xarici gəmilərə göstərilən bəzi xidmətlər üzrə ödənişlərin ABŞ dolları əvəzinə avro ilə aparılacağını açıqlayıb.
Mövzu ilə bağlı danışan liman rəisinin müavini Aleksey Myaskovski bildirib ki, dəyişiklik ilk növbədə yedəkləmə xidmətlərini əhatə edəcək. Onun sözlərinə görə:
“Ukrayna olaraq Avropa İttifaqına üzvlük məqsədimiz çərçivəsində əsas ticarət valyutamızı avro ilə yeniləyirik. Bu ölkəmizin uzunmüddətli inkişaf strategiyasına uyğun addımdır.”
Yeni tətbiqdə ödənişin hesablanma qaydası dəyişməyəcək. Əvvəllər olduğu kimi tariflər gəminin modulu (uzunluq × en × bort hündürlüyü) ilə liman tərəfindən müəyyən edilən əmsalın hasilinə əsasən hesablanacaq. Sadəcə istifadə olunan valyuta avro ilə əvəzlənəcək.
Yeni qaydalar gəminin bayrağından və ya sahibindən asılı olmayaraq bütün xarici gəmilər üçün keçərli olacaq.
Digər tərəfdən bu addımın elan edildiyi dövrdə ABŞ ilə Avropa İttifaqı arasında imzalanan yeni ticarət razılaşmasından sonra neft qiymətlərində artım müşahidə olunub.
