Ümumdünya Dənizçilik Günü: IMO qaydaların praktikada tətbiqinə çağırır
Beynəlxalq Dəniz Təşkilatı (IMO) 24 sentyabr – Ümumdünya Dənizçilik Gününü qlobal geosiyasi gərginliklər və münaqişələrin gəmiçiliyə təsir etdiyi bir dövrdə qeyd edir.
“Seanews.az” xəbər verir ki, IMO bu il və 2027-ci il üçün “Siyasətdən praktikaya: dənizçilikdə mükəmməlliyə yol” mövzusunu seçib. Təşkilat bildirir ki, beynəlxalq qaydaların dünya üzrə effektiv tətbiqi gəmiçiliyin daha təhlükəsiz, dayanıqlı və ekoloji cəhətdən təmiz olmasına, ilk növbədə isə dənizçilərin təhlükəsizliyinin təmin edilməsinə xidmət etməlidir.
IMO-nun məlumatına görə, 2026-cı ildə məcburi xarakter alan Üzv Dövlətlərin Audit Sxemi çərçivəsində 168 ölkə – üzvlərin 94 faizi – auditdən keçirilib. Nəticələr bir sıra ölkələrdə beynəlxalq qaydaların milli qanunvericiliyə tətbiqi, texniki imkanlar, infrastruktur və gəmilərə nəzarətlə bağlı problemlərin qaldığını göstərib.
Təşkilat bu istiqamətdə ölkələrə texniki yardım, təlim proqramları və təcrübə mübadiləsi vasitəsilə dəstək göstərəcək. Təşəbbüs gəmiçiliyin təhlükəsizliyi, rəqəmsallaşma, kibertəhlükəsizlik, dəniz mühitinin qorunması və dekarbonizasiya kimi sahələri də əhatə edir.
24 sentyabrda IMO-nun Londondakı qərargahı mavi rənglə işıqlandırılacaq. Bu, qlobal dənizçilik siyasətinin praktik nəticələrə çevrilməsinə verilən dəstəyin simvoludur.
