LNG tankerlərinin tikintisi üçün 2,42 milyard dollar ayrılıb
“Seanews.az” xəbər verir ki, Ukraynada baş verən hadisələrlə bağlı qlobal böhranın aşkar əlamətlərinə baxmayaraq, Çin öz iqtisadiyyatının yüksəlişini gələcəkdə də təmin etmək və ənənəvi enerji mənbələri ilə təchizatını yaxşılaşdırmaq üçün tədbirlər görür.
Çin Milli Dəniz Neft Şirkətinin (“CNOOC”) rəhbərliyi 12 LNG tankerinin tikintisi üçün 16 milyard yuan (təxminən 2,42 milyard dollar) ayrıldığını rəsmən elan edib.
Artıq müvafiq müqavilələr bağlanıb. İlkin məlumatlara görə, gəmilərin tikintisi Çin Dövlət Gəmiqayırma Korporasiyasının (“CSSC”) törəmə şirkəti olan “Hudong Zhonghua” tərsanəsində həyata keçiriləcək.
Hesabatda xüsusi olaraq vurğulanır ki, perspektivli qazdaşıyıcıların layihəsi ən müasir texnologiya və materiallardan istifadə imkanları nəzərə alınmaqla çinli konstruktorlar tərəfindən hazırlanıb.
Beləliklə, yaxın illərdə beşinci nəsil LNG tankerlərindən ibarət bütöv bir donanmanın yaradılması planlaşdırılır ki, bunun da əsas xüsusiyyətləri ekoloji təmizliyin və yanacağa qənaət imkanlarının artırılması olacaq.
Gəmilərin hər biri 174 min kubmetr LNG götürə biləcək ki, bu da 108 milyon kubmetr yenidən qazlaşdırılmış “mavi yanacağ”a bərabərdir. Tankerlərin sifarişçi şirkətə çatdırılması 2024-2027-ci illər üçün planlaşdırılır ki, bu da tikintinin kifayət qədər yüksək tempini nəzərdə tutur - orta hesabla ildə üç gəmi.
Bildiyiniz kimi, “CNOOC” mayeləşdirilmiş təbii qazın ən böyük milli idxalçısıdır. Əvvəllər şirkətin sifarişi ilə Çin tərsanələrində 10 iri LNG tankeri tikilib, onların layihələri “CSSC” korporasiyasının mütəxəssisləri ilə sıx əməkdaşlıq əsasında hazırlanıb.
Çin operatoru güman edir ki, qısa və ortamüddətli perspektivdə ölkədə təbii qaza tələbat durmadan artacaq və “mavi yanacağın” tədarükü yollarının şaxələndirilməsi ixtisaslaşdırılmış LNG tonajının sürətlə artırılmasını tələb edəcək.
