"Libra Group"un törəmə şirkəti sonuncu konteyner gəmisini də satıb
"Libra Group"un törəmə şirkəti olan "Lomar Shipping" son konteyner gəmisini satıb.
Bu barədə “Seanews.az” “Reuters” agentliyinə istinadən xəbər verir.
“Lomar Shipping”-in saytında qeyd edildiyi kimi, şirkət 2009-2020-ci illərdə 96-sı konteynerdaşıyan olmaqla, ümumilikdə 135 gəmi alıb. Bunlardan 60-a yaxın gəmi 2020-2023-cü illərdə konteyner daşımanın qızğın vaxtlarında ümumilikdə 2 milyard dollara satılıb. Son on ildə isə şirkət 90-dan çox konteyner gəmisi satıb.
Nəşr yazır ki, şirkət gəmiçilik biznesinin bir hissəsini - 30-a yaxın quru yük gəmisi və tanker saxlamaqla daha çox innovasiya və davamlı inkişafa diqqət yetirməyə çalışır.
"Lomar”-ın konteyner seqmentindən çıxması onilliklər boyu davam edən strateji aktiv oyununun bir hissəsi idi", - deyə “Lomar Shipping” şirkətinin baş direktoru Nikolas Georgi “Reuters” agentliyinə bildirib.
Qeyd edək ki, Logothetis ailəsinin nəzarətində olan "Libra Group"-un 20 törəmə şirkəti var və gəmiçilik, aerokosmik, bərpa olunan enerji, daşınmaz əmlak, mehmanxana biznesi və digər sahələrdə aktiv fəaliyyət göstərir.
