Metanolla işləyən yeni konteyner gəmisi “Albert Maersk” adlandırılıb
Mumbaydakı “APM Terminals”-ın yanalma körpüsündə (Danimarkanın “A.P. Moller-Maersk” qrupuna daxildir) daha bir metanolla işləyən konteyner gəmisinə ad verilməsi mərasimi keçirilib.
“Seanews.az” xəbər verir ki, tədbir gəminin Hindistana ilk səfəri çərçivəsində baş tutub.
Gəmi “Albert Maersk” adlandırılıb. Mərasimdə Danimarka gəmiçilik şirkətinin və terminal operatorunun nümayəndələri, Hindistan hökumətinin nazirləri və diplomatları iştirak ediblər. Mərasim zamanı “Maersk” nümayəndələri Hindistan limanlarına və terminallarına, eləcə də quru infrastrukturunun inkişafına təxminən 5 milyard dollar sərmayə qoymağı nəzərdən keçirdiklərini açıqlayıblar.
“Albert Maersk” tutumu 16,6 min TEU olan iki yanacaqlı metanol konteyner gəmiləri seriyasında 11-ci gəmidir. Bu gəmilərin hamısı Ulsandakı Cənubi Koreyanın “Hyundai Heavy Industries” tərsanəsində tikilir.
Daha əvvəl xəbər verildiyi kimi, 2025-ci ildə Danimarkanın “A.P. Moller-Maersk” xətti gəmiçilik şirkəti metanolla işləyən iki yanacaqlı mühərrikləri olan ən azı 19 yeni konteyner gəmisini istismara verməyi planlaşdırır.
