Karbon tutma qurğusu olan dünyanın ilk FPSO gəmisi Şanxayda sifarişçiyə təhvil verilib
Karbon tutma, saxlama və boşaltma qurğusu ilə təchiz edilmiş dünyanın ilk FPSO gəmisi “Agogo” Şanxayda sifarişçiyə təhvil verilib.
“Seanews.az” xəbər verir ki, bu barədə “Sinxua” agentliyi məlumat yayıb.
Uzunluğu 333 metr, eni 60 metr olan FPSO “Agogo” 1,6 milyon barel xam neft saxlama qabiliyyətinə malikdir. Naviqasiya və neft hasilatı zamanı yaranan karbon dioksidi tutan gəmi bu emissiyalardan elektrik enerjisi istehsal etməklə həm ətraf mühitin qorunmasını, həm də yanacağa qənaəti təmin edə bilər.
Orta hesabla, adi neft hasilatı, saxlama və boşaltma gəmiləri hər barel neft üçün təxminən 20-30 kq CO2 ekvivalenti buraxır. “Agogo” gəmisinin bu cür emissiyaları ildə təxminən 230 000 ton azaldacağı gözlənilir. Bu, 7333 hektar meşə sahəsinin illik karbon qazını udmasına bərabərdir.
“Məlum olduğu kimi, şelfdə neft və qazın çıxarılması zamanı xeyli miqdarda karbon qazı əmələ gəlir. “Agogo” gəmisinin istismara verilməsi dənizdə karbon tutmada böyük bir addımdır və qlobal dəniz neft sənayesinin dekarbonizasiyasına töhfə verəcək”, - məqalədə deyilir.
