“NCL” yeni kruiz gəmisini təhvil alıb
“Norwegian Cruise Line” (“NCL”) yeni kruiz gəmisi “Norwegian Aqua”-nı təhvil alıb. Bu, şirkətin donanmasında 20-ci və yeni “Prima Plus” gəmilər seriyasında ilk gəmisidir.
“Seanews.az” xəbər verir ki, qəbul mərasimi İtaliyanın Marghera şəhərindəki “Fincantieri” tərsanəsində baş tutub.
“Norwegian Aqua” istismara verilməyə hazırlanarkən, həmin zavodda seriyanın “Norwegian Luna” adlı növbəti gəmisi quru dokdan çıxarılıb. Təchizat, daxili bəzək üçün üzən doka köçürüləcək gəmi istismar üçün 2026-cı ilin yazında hazır olacaq.
“Norwegian Aqua” sələfləri olan “Norwegian Prima” və “Norwegian Viva”-dan ölçü və tutumuna görə 10% daha böyükdür. Uzunluğu 321,8 metr, ümumi tutumu 156,3 ton, sərnişin tutumu 3571 nəfər olan gəmi istismara verildikdən sonra Floridadakı Mayami və Kanaveral (Orlando), eləcə də Nyu-Yorkdan səfərlərə çıxacaq. Florida limanlarından “Norwegian Aqua” Baham adalarına qısa səfərlər, eləcə də Karib dənizində - Puerto Plata (Dominikan Respublikası), Müqəddəs Tomas (Virgin adaları, ABŞ) və Baham adalarında kruiz limanlarına yeddi günlük səfərlər həyata keçirəcək. Orada yeni kruiz körpüsünün tikintisinin 2025-ci ilin sonunadək başa çatdırılması nəzərdə tutulur.
Qeyd edək ki, “Fincantieri” dünyanın ən böyük gəmiqayırma qruplarından biridir. Tərsanələrində 7 mindən çox gəmi tikilən qrup 18 zavodu birləşdirir və kruiz gəmilərinin, bərələrin, dəniz gəmilərinin və meqayaxtaların tikintisi üzrə ixtisaslaşıb.
“Norwegian Cruise Line” şirkəti “Norwegian Cruise Line Holdings”-ə (“NCLH”) daxildir. 46 il əvvəl yaradılan “NCL” 11 xüsusi kruiz gəmisində kruiz səfərləri həyata keçirir.
