“Jiangnan Shipyard” dünyanın ikinci iri etan tankerini sifarişçiyə vaxtından əvvəl təhvil verib
Çinin “Jiangnan Shipyard” zavodunda (“CSSC” dövlət korporasiyasına daxildir) 99 min kubmetr tutumlu etanın daşınması üçün ikinci gəminin Çinin “Tianjin Southwest Maritime” şirkətinə təhvil verilməsi mərasimi keçirilib.
“Seanews.az” xəbər verir ki, “Gas Jessamine” adlı gəmi vaxtından bir ay tez inşa edilib.
Etan tankerlərinin layihəsi “Jiangnan Shipyard” zavodunun öz mühəndis və konstruktorları tərəfindən hazırlanıb. “ABS” sinfinə uyğun tikillən, uzunluğu 230 metr, eni 36,6 metr olan tanker müxtəlif mayeləşdirilmiş qazların daşınması üçün nəzərdə tutulub.
Qeyd olunur ki, bu gəmi layihəsi ən son elmi-texniki həllərin tətbiqinə görə Çin Gəmiqayırma Cəmiyyətindən ən yüksək mükafat alıb. “Gas Jessamine” Çinin LPG tanker donanmasının sahibi “Tianjin Southwest Maritime” üçün “Jiangnan” gəmiqayırma zavodunda inşa edilən 17-ci gəmidir.
