“HMM”-nin metanolla işləyən ilk 9 000 TEU tutumlu konteyner gəmisi istismara hazırdır
Cənubi Koreyanın “HMM” gəmiçilik şirkəti 9 000 TEU tutumlu doqquz konteyner gəmisi seriyasından birincini - “HMM Green”-i istismara qəbul edib.
“Seanews.az” xəbər verir ki, gəmi metanolla işləyə biləcək.
Konteyner gəmilərinin tikintisi üçün sifariş 2023-cü ilin fevralında verilib. “HD Hyundai Samho Heavy Industries” tərsanəsi yeddi gəmi, “HJ Shipbuilding & Construction” zavodu isə daha iki gəmi tikəcək. Bütün seriyalar 2026-cı ildən gec olmayaraq sifarişçiyə təhvil verilməlidir. Bu seriyanın gəmiləri müxtəlif texnologiyaların tətbiqi ilə seçilir, ekoloji tələblərə cavab verir.
“HMM Green” konteyner gəmisi Uzaq Şərq - Asiya - Hindistan və Aralıq dənizi (“FIM”) xəttində üzəcək və işlətmək üçün lazım olan metanol yanacağını Çinin Şanxay limanında qəbul edəcək.
“HMM” dünyanın iri logistika və gəmiçilik şirkətlərindən biridir. 50-dən çox marşruta xidmət göstərən şirkətin donanması ümumi tutumu 880 min TEU-dan çox olan 80 gəmidən ibarətdir.
