Metanolla işləyən yeni konteyner gəmisi “Nestle” üçün yük daşıyacaq
Danimarkanın “A.P.Moller-Maersk” nəqliyyat və logistika qrupu Rotterdam limanının “APM Terminals Maasvlakte II” terminalında metanolla işləyən yeni iki yanacaqlı konteyner gəmisinə advermə mərasimi keçirib.
“Seanews.az” xəbər verir ki, bu barədə qrupun mətbuat xidməti məlumat yayıb.
“Adrian Maersk” adlandırılan gəmi “Maersk”-in ekoloji cəhətdən təmiz “ECO Delivery Ocean” xidməti çərçivəsində “Nestle” şirkəti üçün yük daşıyacaq. “Maersk” gəmiləri istixana qazı emissiyalarını azaltmaq üçün bu xidmətdə yalnız alternativ yanacaqlardan istifadə edir.
“Adrian Mærsk” gəmisinin konteyner tutumu 16 min TEU-dan çoxdur. Rotterdamdan ilk səfərini başa vurduqdan sonra gəmi Asiya-Aralıq dənizi marşrutuna xidmət göstərəcək.
Bio və sintetik metanolun istifadəsi xammal və istehsal prosesindən asılı olaraq adi karbohidrogen yanacaqları ilə müqayisədə istixana qazı emissiyalarını 65-90% azalda bilər. Qrup həmçinin mayeləşdirilmiş metanla işləyən iki yanacaqlı gəmiləri istismara verməyi planlaşdırır.
Qeyd edək ki, “Maersk” 2025-ci ilin sonuna qədər metanolla işləyən və iki yanacaqlı mühərrikləri olan 19 yeni konteyner gəmisini istismara qəbul edəcək.
