“ESL Shipping” hibrid mühərrikli “Terramar” gəmisini istismara qəbul edib
“ESL Shipping” dedveyti 5,4 min ton olan 12 quru yük gəmisi seriyasından altıncını - “Terramar” gəmisini istismara qəbul edib. Gəmilər “ESL Shipping”-in törəmə şirkəti “AtoB@C Shipping” üçün tikilir.
“Seanews.az” xəbər verir ki, yeni quru yük gəmisinin təhvil verilməsi Hindistanda baş tutub. Bu sifariş əsasında inşa edilən bütün gəmilər hibrid mühərriklərlə təchiz olunub və “1A” buz sinfinə malikdir.
Seriyanın gəmiləri Baltik dənizi və Şimali Avropada gəmiçilik xətlərinə xidmət göstərəcək. Limanlarda dayanarkən gəmilərin batareyaları sahil stansiyalarından doldurulacaq.
Gəmilərin inşası cədvəl üzrə aparılır. 2025-ci ilin fevral ayında seriyanın 11-ci gəmisi üçün metal kəsmə mərasimi keçirilib və martın əvvəlində yeddinci quru yük gəmisi suya salınıb. Qalan altı gəmi isə hər rübdə biri olmaqla 2026-cı ilin payızına qədər təhvil verilməlidir.
Qeyd edək ki, “ESL Shipping” Baltik dənizində əsas quru yük daşıyıcısıdır. Şirkət iri tonajlı dəniz gəmilərinin yüklənməsi və boşaldılması üzrə xidmətlər göstərir. Donanması dedveyti 4 mindən 25 min tona qədər olan 40 balkerdən ibarətdir.
“AtoB@C Shipping” (2018-ci ildən “ESL Shipping”-in törəmə şirkəti) 2000-ci ildə yaradılıb və toplu, dənəvər və ümumi yüklər daşıyan kabotaj gəmiləri donanmasının operatorudur.
