“MSC Antonia” gəmisi mümkün “GPS” saxtakarlığına görə üçüncü gündür Qırmızı dənizdə saya oturub
“Mediterranean Shipping Company”-ə (“MSC”) məxsus “MSC Antonia” konteyner gəmisi 2025-ci il mayın 10-da Səudiyyə Ərəbistanının Ciddə limanı yaxınlığında Qırmızı dənizdə saya oturub və mayın 13-ü səhər saatlarından etibarən hərəkətsiz olaraq qalır.
“Seanews.az” xəbər verir ki, ilkin məlumatlar hadisənin “GPS” saxtakarlığı - gəmiləri yoldan çıxara bilən yalançı qlobal yerləşdirmə sistemi siqnallarının ötürülməsi ilə əlaqəli olduğunu göstərir.
Dəniz gəmilərini izləmək üçün süni intellektdən istifadə edən “Windward” analitik şirkəti həftə sonu hadisə yerində çoxsaylı saxtakarlıq nümunələri aşkar etdiyini bildirib. Vurğulanıb ki, Qırmızı dənizdə “GPS” müdaxiləsi geniş yayılmış problemə çevrilib.
7000 TEU tutumlu “MSC Antonia” Ciddə limanı da daxil olmaqla Qərbi Aralıq dənizi və Qırmızı dəniz marşrutlarına xidmət göstərir.
Hadisə zamanı “MSC” və ya Səudiyyə Ərəbistanı səlahiyyətlilərindən heç bir rəsmi açıqlama verilməyib.
