Dünyanın ən böyük yelkənli kruiz gəmisi suya buraxılıb
Dünyanın ən böyük yelkənli kruiz gəmisi sayılan “Orient Express Corinthian” bu həftə Fransanın Saint-Nazaire şəhərindəki “Chantiers de l’Atlantique” tərsanəsində suya buraxılıb.
"Seanews.az" xəbər verir ki, 220 metr uzunluğunda və 26.200 gros tonlu bu gəmi 110 sərnişin tutumuna malik 54 lüks süitdən ibarət olacaq.
Gəmi məşhur “Orient Express” ilə Fransanın "Accor" hotel qrupunun kruiz bazarına rəsmi daxil olmasını simvolizə edəcək.
Üzən vasitənin ilk metal kəsimi 2024-cü ilin martında həyata keçirilib və montaj işləri ilin əvvəlində başlanıb.
"Orient Express Corinthian" yelkənlərlə əlverişli şəraitdə 100% bərpa olunan enerji ilə hərəkət edə biləcək. Gəmidə LNG ilə işləyən hibrid enerji sistemi, süni intellektlə işləyən üzən obyekt aşkarlama və dinamik mövqe saxlama texnologiyası da yer alacaq.
Gəmi 2026-cı ilin iyununda Marseldən ilk səfərinə çıxacaq.
