Cənubi Koreyada ilk dəfə olaraq kimyəvi maddə sızmalarına reaksiya vermək üçün ixtisaslaşmış gəmi inşa ediləcək
Cənubi Koreyada ilk dəfə olaraq dənizdə kimyəvi maddə sızmalarına operativ cavab vermək üçün ixtisaslaşmış gəmi inşa ediləcək.
"Seanews.az" xəbər verir ki, gəmi "HJ Shipbuilding and Construction" (HJSC) şirkəti tərəfindən inşa ediləcək. Bu məqsədlə Koreya Sahil Mühafizəsi ilə 68,8 milyard von (təxminən 47,7 milyon ABŞ dolları) dəyərində müqavilə imzalanıb.
Bu gəmi Cənubi Koreyada öz sinfində ilk olacaq.
Xüsusi təyinatlı gəmi dənizdə kimyəvi qəzalar zamanı müdaxilə üçün nəzərdə tutulub və kimyəvi analiz avadanlıqları, neft yığma sistemləri və yedəkləmə qurğuları ilə təchiz ediləcək.
HJSC-nin məlumatına görə, bu tip gəmilər hazırda yalnız məhdud sayda ölkədə, o cümlədən ABŞ, Almaniya və İsveçdə istismar olunur.
Yeni gəminin uzunluğu 70 metr, eni 14,6 metr, suya oturumu isə 6,5 metr təşkil edir. Gəmi maksimum 15,5 düyün sürət yığa bilir və 1 600 kilometr üzmə məsafəsinə malikdir.
30 min tonluq qəza vəziyyətində olan gəmilərə yardım göstərmək imkanına malik yedəkləmə avadanlığı ilə təchiz edilən gəmi, dalğaların hündürlüyü 4 metrə çatan dəniz şəraitində axtarış-xilasetmə və yanğınsöndürmə əməliyyatları aparmaq üçün layihələndirilib.
Gəmidə həmçinin təhlükəli maddələrə qarşı təhlükəsizlik reaksiya sistemi, aşkarlama və analiz sistemi, eləcə də saatda 9 600 kubmetr həcmində yanğınsöndürmə gücünə malik avadanlıq quraşdırılacaq.
1 900 tonluq yeni gəminin 2028-ci ildə istismara verilməsi planlaşdırılır.
