Okean gəmiləri üçün daha böyük yelkənlər hazırlanıb
"Econowind" şirkəti uzaq səfər gəmiçiliyi bazarı üçün nəzərdə tutulmuş daha böyük ölçülü yeni "VentoFoil 5-series" külək mühərriki sistemini təqdim edib. Şirkətin uğurlu 16 metrlik modelinin əsasında hazırlanan 30 metrlik bu yeni sorma qanadı (suction wing) okean gəmilərində yanacaq sərfiyyatını və emissiyaları əhəmiyyətli dərəcədə azaltmaq üçündür.
“Seanews.az” xəbər verir ki, yeni nəsil qurğunun ilk nümunəsi bu yay külək dəstəkli gəmiçilik sahəsində qabaqcıl olan "Boomsma Shipping" şirkətinin gəmisində quraşdırılacaq. "Boomsma Shipping" rəsmiləri külək mühərriklərinin həm iqtisadi, həm də ekoloji cəhətdən özünü doğrultduğunu, bu səbəbdən yeni inşa edilən səkkiz gəminin hər birinin külək texnologiyalarına uyğun hazırlanacağını bildiriblər.
"Econowind" rəhbərliyi isə istehsalı Asiyaya köçürməklə texnologiyanın yeni gəmiqayırma layihələrinə inteqrasiyasını asanlaşdırmağı hədəfləyir. Mütəxəssislər hesab edirlər ki, daha böyük gəmilərdə və uzunmüddətli marşrutlarda bu cür texnologiyaların tətbiqi yanacaq qənaəti potensialını daha da cəlbedici edir.
