Gəmilərin yanacaq sərfi və təhlükəsiz marşrutu indi tək sistemlə hesablanacaq
"BigOceanData" şirkəti gəmi səfərlərinin daha səmərəli idarə olunması üçün platformasına yeni marşrut optimallaşdırılması funksiyasını əlavə edib.
“Seanews.az” xəbər verir ki, "ABB Ability™" texnologiyasına əsaslanan bu yeni xidmət hava şəraiti, gəminin texniki göstəriciləri və əməliyyat məhdudiyyətlərini vahid sistemdə birləşdirir. Bu isə kapitan və operatorlara marşrutları yanacaq sərfi, xərclər, emissiya həcmi və gəliş vaxtı kimi göstəricilər üzrə müqayisə etmək imkanı verir.
Sistem gəmi üçün ən əlverişli yolu seçərkən bir neçə mühüm meyarı eyni anda nəzərə alır. İlk növbədə, gəminin ən az yanacaq sərf edəcəyi marşrutu müəyyən edərək xərcləri azaldır və fırtına, güclü axınlar kimi hava şəraitini öncədən proqnozlaşdıraraq gəmini təhlükəsiz zonaya yönləndirir. Eyni zamanda, karbon qazı ifrazını minimuma endirməklə beynəlxalq ekoloji tələblərə uyğunluğu təmin edir, limana çatacaq dəqiq vaxtı hesablayaraq boşdayanmaların qarşısını alır və hər bir gəminin özünəməxsus texniki göstəricilərinə uyğun fərdi planlar qurur.
Əvvəllər gəmi heyəti hava proqnozu, yanacaq hesabı və izləmə üçün ayrı-ayrı proqramlardan istifadə etməli olurdu. İndi isə bütün bu məlumatlar "canlı" rejimdə bir-biri ilə əlaqəli şəkildə işləyir.
