Beynəlxalq Təsnifat Cəmiyyətləri Assosiasiyası (IACS) gəmidaxili qaldırıcı avadanlıqlar üzrə tövsiyələrini təqdim etdi
Dünyanın aparıcı təsnifat cəmiyyətlərini birləşdirən IACS gəmi qaldırıcı qurğularının təhlükəsizlik standartlarını təkmilləşdirmək məqsədilə yeni tövsiyələr dərc edib. Bu, SOLAS konvensiyasının yeni tələblərindən irəli gəlib.
“Seanews.az” xəbər verir ki, Beynəlxalq Dəniz Təşkilatı (IMO) tərəfindən qəbul edilən və 1 yanvar 2026-cı ildən qüvvəyə minən qaydalar həm yeni quraşdırılan, həm də mövcud qaldırıcı avadanlıqların layihələndirilməsi, sınaqdan keçirilməsi, texniki baxışı və istismarını əhatə edir. Bu tənzimləmələr dənizçilikdə ölüm halları, yaralanmalar və gəmi zədələnmələri ilə nəticələnən qəzaların qarşısını almağa hədəflənib.
IACS-in təqdim etdiyi sənəd SOLAS qaydalarının qlobal miqyasda vahid qaydada tətbiqini asanlaşdırmaq üçün əhatəli rəhbərlik təqdim edir. Tövsiyələrdə yeni və köhnə avadanlıqların fərqləndirilməsi, 1000 kq-dan aşağı yükgötürmə qabiliyyəti olan qurğulara münasibətdə tələblər, sertifikatlaşdırma prosedurları və yük sınaqlarının müddətləri kimi mühüm məqamlar əks olunub. Həmçinin həm xilasedici vasitələr, həm də yük əməliyyatları üçün nəzərdə tutulan (ikili təyinatlı) qurğuların və gəmidaxili dəyişdirilə bilən yüktutucu hissələrin statusuna aydınlıq gətirilib.
Sənəd eyni zamanda yoxlama və sınaq rejimlərinin Uyğunlaşdırılmış Sörvey və Sertifikatlaşdırma Sisteminə (HSSC) inteqrasiyasını təmin edir.
