Kanada Sahil Mühafizəsinin ilk yeni Arktika və dəniz patrul gəmisi suya salınıb
Kanada milli gəmiqayırma strategiyası çərçivəsində donanmasını yeniləməyə davam edir. Bu istiqamətdə növbəti addım olaraq gələcəkdə "CCGS Donjek" adlanacaq ilk Arktika və dəniz patrul gəmisi (AOPS) Halifaks tərsanəsində uğurla suya buraxılıb.
"Seanews.az" xəbər verir ki, "Irving Shipbuilding" tərəfindən inşa edilən gəmi 103 metr uzunluğa və 6,677 ton subasımına malikdir. Bu çoxməqsədli gəmi Arktika sularında buzqırma, axtarış-xilasetmə, balıqçılıq patrulu və humanitar yardım missiyalarını yerinə yetirmək üçün layihələndirilib.
Helikopter meydançası, tibbi mərkəz və elmi araşdırmalar üçün 20 tonluq kranla təchiz edilən gəmi, həmçinin sahil icmalarının təminatına dəstək verəcək.
Bu layihə Kanadanın 2025-2026-cı illər büdcəsində müdafiə və təhlükəsizlik üçün ayırdığı 63 milyard Kanada dolları məbləğindəki geniş investisiya paketinin tərkib hissəsidir.
Hazırda yanalma körpüsündə son sınaqlara hazırlaşan "CCGS Donjek"in 2026-cı ilin sonunda, onunla eyni tip gəmi olan "CCGS Sermilik"in isə 2027-ci ildə təhvil verilməsi planlaşdırılıb.
