Danimarka Ali Məhkəməsində vergi orqanına uduzan “Maersk” 190 milyon dollar ödəyəcək
Danimarkanın “AP Moller-Maersk A/S” şirkətlər qrupu Danimarka Ali Məhkəməsində “TotalEnergies SE”-nin mülkiyyətinə keçən Əlcəzair və Qətərdəki neft və qaz törəmə şirkətlərindən əldə edilən gəlirlərə görə vergilərin tutulması iddiasında uduzub.
"Seanews.az" xəbər verir ki, Kopenhagen məhkəməsinin qərarında (aşağı məhkəmənin 2022-ci il hökmünü ləğv etməklə) “Maersk” 2006-2008-ci illər arasında əldə etdiyi təxminən 1,3 milyard kron (190 milyon dollar) gəlir üçün vergi ödəməlidir.
“Maersk” "hökmdən təəccübləndiyini" söyləyib, çünki o, mümkün cəriməni ödəmək üçün sonrakı illərdə artıq əlavə vergi ödənişləri edib və buna görə də heç bir pul ödəməli olacağını gözləməyib.
Qərarda “TotalEnergies” enerji şirkətinin də adı var, lakin fransız şirkətindən hər hansı ödəniş tələb edilib-edilməyəcəyi bəlli deyil. “Maersk”-in sözçüsü bildirib ki, şirkət “indi hökmün nəticələrini nəzərdən keçirəcək”.
Aktivlər “TotalEnergies” tərəfindən 2017-ci ildə “Maersk” neft və qaz biznesini borc da daxil olmaqla təxminən 7,5 milyard dollara satdığı zaman bağlanmış müqavilə əsasında əldə edilib. Aktivlərin satışı o vaxt “Maersk”-in enerji investisiyalarından imtina etmək, nəqliyyat və logistika sənayesinə diqqəti yönəltmək strategiyasının bir hissəsi idi.
Vergi departamenti “Maersk”-in neft biznesinin uzun illər ərzində vergi məqsədləri üçün bazar qiymətləri ilə qiymətləndirilməsi tələb olunan iki törəmə müəssisəyə pulsuz xidmətlər göstərdiyini iddia edirdi. Bu, şirkətin transfer qiymətləri qaydalarını pozması demək idi.
Danimarka vergi nazirliyinin rəhbəri Jeppe Bryus bildirib ki, məhkəmənin qərarı "uzun müddətdir davam edən işə son qoyur" və indi Danimarka "vergilərdən öz haqlı payını" alacaq.
Ali Məhkəmənin qərarında deyilir ki, cavabdehlər daha 4 milyon kron məhkəmə xərcləri və 3 milyon kron faiz ödəməli olacaqlar.
