“Arqos Georgia” gəmisinin itkin düşmüş heyət üzvlərinin axtarışı nəticə verməyib
Folklend adaları yaxınlığında batan “Arqos Georgia” gəmisinin itkin düşmüş heyət üzvlərinin, o cümlədən rusların axtarışı başa çatıb.
“Seanews.az” xəbər verir ki, bu barədə “RİA Novosti”-yə gəmi sahibi “Ervik Havfiske” şirkətinin icraçı direktoru Stiq Ervik bildirib.
"Axtarış başa çatıb, başqa heç kimi tapmamışıq", - deyib.
İcraçı direktor bildirib ki, axtarış-xilasetmə əməliyyatının bərpa olunacağı ehtimalı azdır.
Xatırladaq ki, Norveçin “Ervik Havfiske” şirkətinə məxsus “Arqos Georgia” balıqçı gəmisi Müqəddəs Yelena adalarının bayrağı altında üzüb. “Gəmi iyulun 22-də axşam saatlarında Atlantika okeanının cənubunda Folklend adaları yaxınlığında batıb.
Gəmidəki 27 nəfərdən ibarət heyətin onu ispan, səkkizi rus, ikisi uruqvay, ikisi peru və beşi indoneziyalı olub. Gəminin batması nəticəsində üçü rusiyalı olmaqla dörd nəfər itkin düşüb.
