Qazaxıstan Konqo limanının imkanlarından istifadə etməkdə maraqlıdır
Qazaxıstan Konqonun Pointe Noire limanının imkanlarından istifadə etməkdə maraqlıdır.
“Seanews.az” xəbər verir ki, bunu Qazaxıstan Prezidenti Kasım-Jomart Tokayev Konqo Prezidenti Denis Sassu Nqesso ilə media nümayəndələri üçün keçirdiyi birgə brifinqdə deyib.
“Əgər Konqo Respublikası Mərkəzi Afrika regionuna giriş qapısıdırsa, Pointe Noire limanı onun açarı kimi xidmət edir. Dəniz limanının böyük potensialı var və Qazaxıstan bu limanın imkanlarından istifadə etməkdə maraqlıdır”, - deyə Qazaxıstan rəhbəri bildirib.
Afrika respublikasının rəhbəri öz növbəsində qeyd edib ki, Konqo iqtisadiyyatının əsasını neft sənayesi təşkil edir və Qazaxıstanın bu sahədə böyük təcrübəsi var. “Bundan əlavə, biz təbii ehtiyatların digər növlərini də inkişaf etdirmək üçün birgə işləyə bilərik. Konqonun enerji sektoru Qazaxıstan şirkətlərinə böyük imkanlar təklif etməyə hazırdır”.
Konqo Prezidentinin Qazaxıstana rəsmi səfəri zamanı imzalanan sənədlər arasında “KazMunayQaz” SC ilə Konqo Respublikasının Milli Neft Şirkəti arasında neft-qaz sənayesində əməkdaşlıq haqqında saziş və Qazaxıstan Sənaye və Tikinti Nazirliyi ilə Konqo Respublikası Mədən və Geologiya Nazirliyi arasında mədən və geologiya sahəsində memorandum da var.
