Çin operatorları kütləvi şəkildə konteyner gəmilərini icarəyə götürürlər
Rusiyaya xidmətlərə diqqət yetirən və artan tələb fonunda Qırmızı dəniz regionunda işləyən Çin operatorları əvvəllər ölkədaxili marşrutlarda istifadə edilən konteyner gəmilərini icarəyə götürürlər.
“Seanews.az” bu barədə “Linerlytica”-nın hesabatına istinadən xəbər verir.
Belə ki, “OVP Shipping”, “Safetrans Line” və “Tranzit” şirkətləri müvafiq olaraq 2 min TEU tutumlu yeni inşa edilmiş “De Xin Shang Hai”, 2,7 min TEU tutumlu “Xin Yong Chang 27” və 1,6 min TEU tutumlu “Xiang Yuan He Run” gəmilərini icarəyə götürüblər.
“Jiangxi Dexin”-ə məxsus “De Xin Shang Hai” konteynerdaşıyanı gündəlik 25 000 dollara bir il müddətinə icarədə olacaq.
“Shishi Yongyi Shipping” şirkətinin “Xin Yong Chang 27” gəmisi üçün isə on ayda hər gün üçün 43 000 dollar ödəniləcək.
“Anhui Sunriver” şirkətindən icarəyə götürülmüş “Xiang Yuan He Run” konteyner gəmisi üçün tarifi açıqlanmayıb.
“SeaLead” şirkəti 2018-ci ildə inşa edilmiş 2500 TEU-luq “Zhong Gu Ri Zhao” konteyner gəmisini gündəlik 28 000 dollara “Zhonggu Logistics”-dən bir il müddətinə icarəyə götürüb.
“Linerlytica” qeyd edir ki, "Çin gəmiləri Rusiyaya və Qırmızı dənizlə yük daşıya bildiyi üçün tələb olunur, digər gəmi sahiblərinin əksəriyyəti isə ikinci dərəcəli sanksiyalar və Yəmən Husilərinin hücum təhlükəsi səbəbindən gəmilərinin bu bölgələrə girməsinə icazə vermir."
