Patrul katerləri Yunanıstan Hərbi Dəniz Qüvvələrinin qəhrəmanlarının adını daşıyır
Yunanıstanın “Salamis” gəmiqayırma zavodunda Yunanıstan Hərbi Dəniz Qüvvələrinin dörd patrul katerinin istismara verilməsi mərasimi keçirilib.
“Seanews.az” xəbər verir ki, “Island” sinifli gəmilər Yunanıstan Hərbi Dəniz Qüvvələrinin dörd qəhrəmanının adını daşıyır: “R197 Mantuvalos”, “R198 Galanis”, “R288 Liakos” və “R289 Gialopsos”.
Katerlərin əsasən Türkiyə sahillərinə yaxın adaların ətrafındakı ərazilərə xüsusi diqqət yetirməklə, Egey dənizinin şərqində patrul xidməti həyata keçirəcəkləri deyilir.
ABŞ Sahil Mühafizəsinin xidmətində olan bu gəmilər 2023-cü ilin iyulunda Yunanıstana gəlib. Onların nəqlinə və yerli gəmiqayırma zavodlarında uzunmüddətli bərpa və modernləşdirməsinə təxminən 42 milyon avro xərclənib.
“Island” sinifli gəmilərin yaşının 30 ildən çox olmasına baxmayaraq, Yunanıstan Hərbi Dəniz Qüvvələrində onların köhnəlmiş “Nasty” sinif patrul katerlərini lazımınca əvəz edəcəyinə inanırlar.
