İsveç hakimiyyəti bolqar dənizçilərinin olduğu “Vezhen” gəmisindən kabelə ziyan vurmaqda şübhələnir
Bolqarıstanın daxili işlər və nəqliyyat nazirləri Baltik dənizində sualtı telekommunikasiya kabelini zədələməkdə şübhəli bilinərək İsveç hakimiyyəti tərəfindən saxlanılan “Vezhen” gəmisi ilə bağlı ölkənin Milli Məclisində çıxış ediblər.
“İnterfaks” xəbər verir ki, bu barədə Bolqarıstanın Milli Televiziyası məlumat yayıb.
“Gəminin göyərtəsində olan bolqar dənizçilərin səhhəti yaxşıdır və onlara qarşı heç bir ittiham irəli sürülməyib. Bolqarıstan konsulu onlarla daimi əlaqə saxlayır. Ona gəmiyə minməyə icazə verilib, lakin əlverişsiz hava şəraiti səbəbindən hələ də gəmiyə gedə bilməyib”, - deyə respublikanın Daxili İşlər Nazirliyinin başçısı Georgiyev bildirib.
“Seanews.az” xəbər verir ki, Bolqarıstanın Varna limanında yerləşən, lakin Malta bayrağı altında üzən “Bolqar Dəniz Donanması” şirkətinə məxsus “Vezhen” gəmisi gübrə yükü ilə Rusiyanın Ust-Luqa limanından Latın Amerikası istiqamətində hərəkət edib. 17 nəfərdən ibarət heyətin səkkizi Bolqarıstan vətəndaşı və doqquzu Myanma dənizçisidir.
“Vezhen” yanvarın 26-da sualtı fiber-optik kabel zədələnən zaman İsveçin Qotland adası ilə Latviya arasındakı ərazidə olan bir neçə gəmidən biridir və onun kursu birbaşa qəza yerindən keçdiyini göstərir.
Bolqarıstanın Milli Televiziya şirkətinin iddiasına görə, vəziyyəti yalnız gəminin bayrağı altında üzdüyü Malta araşdıra bilər.
