Avstraliyanın Baş naziri icarəyə verilmiş limanı geri qaytarmağa söz verib
Avstraliya hökuməti 2015-ci ildə Çinin “Landbridge” şirkətinə 99 il müddətinə icarəyə verilmiş Darvin şəhərindəki limanı geri qaytarmağa çalışacaq.
“Seanews.az” xəbər verir ki, ölkənin Baş naziri Entoni Albanese belə deyib.
Albanese Darvin limanını Avstraliyanın mülkiyyətinə qaytaracaqlarına söz verib: "Mənim hökumətim bu məqsədə nail olmaq üçün indiki və gələcək liman operatorları, eləcə də Şimal ərazisi hökuməti ilə işləməyə sadiqdir".
Hökumət başçısı vurğulayıb ki, hakimiyyət limanın dövlət mülkiyyətinə qaytarılması üçün istənilən tədbiri görməyə hazırdır. "Əgər müqaviləni təmin edə bilsək və mülkiyyət hüququnu Birliyin müdaxiləsi olmadan Avstraliyanın nəzarətinə qaytara bilsək, bunu edəcəyik, lakin məcburi satınalmadan istifadə etməyə də hazırıq", - deyib.
Çinin “Landbridge” şirkəti isə Darvin limanının satılmadığını bildirib.
“Landbridge” 506 milyon Avstraliya dolları (təxminən 320 milyon dollar) ödəyərək Darvin dəniz limanını (Avstraliya qitəsinin şimal-qərb sahilində yerləşir) 99 illik icarəyə götürüb. Müqavilənin şərtlərinə əsasən, onun öz vəsaiti hesabına limanın infrastrukturunu modernləşdirmək və genişləndirmək, yanalma körpüləri və yükboşaltma boşaltma körpüləri tikmək, limanın gəmiçilik kanalını dərinləşdirmək hüququ var.
2015-ci ildə icarə müqaviləsindən sonra ABŞ səlahiyyətliləri Çin şirkətinin ABŞ Hərbi Dəniz Qüvvələrinin istifadə etdiyi hərbi bazaların yaxınlığında olması ilə bağlı narahatlıqlarını bildirərək Avstraliya hökumətini qərara yenidən baxmağa çağırıblar.
2022-ci ilin mayında hakimiyyətə gəldikdən sonra Albanese müqaviləni ləğv edəcəyinə söz verib, lakin onun şərtlərini hərtərəfli təhlil etdikdən sonra dövlət komissiyası "milli təhlükəsizlik səbəbi ilə müqaviləni ləğv etmək üçün heç bir əsas tapmayıb".
