Fukusima AES-dən 7 800 ton su okeana axıdılacaq
Yaponiyanın "Tokyo Electric Power" (TEPCO) şirkəti "Fukusima-1" atom elektrik stansiyasından (AES) texniki baxımdan təmizlənmiş suyun 13-cü partiyasını okeana buraxmağa başlayıb.
Oxu.az bu barədə şirkətin saytına istinadla məlumat verir.
Bildirilir ki, bu mərhələdə də əvvəlki hallarda olduğu kimi, 7 800 ton suyun okeana axıdılması planlaşdırılır.
Xatırladaq ki, 2011-ci ildə baş verən zəlzələ və sunami nəticəsində AES-in soyutma sistemləri sıradan çıxmış, üç reaktor zədələnmiş və ətraf mühitə radiasiya yayılmışdı. O vaxtdan bəri reaktorların soyudulması üçün istifadə olunan su toplanaraq təmizlənir və bir hissəsi təkrar istifadə olunur.
Yaponiya hökumətinin 2023-cü ildə verdiyi qərara əsasən, təmizlənmiş suyun mərhələli şəkildə okeana buraxılması 30-40 il davam edəcək. Su tam təmizlənməsinə baxmayaraq, tərkibində tamamilə çıxarıla bilməyən tritium qalır. Lakin bu elementin miqdarı beynəlxalq normativlərdən dəfələrlə aşağı səviyyəyə qədər azaldılaraq buraxılır.
