Hindistanda gəmiqayırma zavodunda bədbəxt hadisə: 1 nəfər ölüb, 1 nəfər ağır xəsarət alıb
Hindistanın Kolkata şəhərində yerləşən dövlətə məxsus “Garden Reach Shipbuilders and Engineers” (GRSE) gəmiqayırma zavodunda iyulun 17-də baş verən qəza nəticəsində bir nəfər ölüb, daha bir nəfər ciddi xəsarət alıb.
"Seanews.az" xəbər verir ki, ilkin məlumatlara görə, zavodun kranlarından birində istifadə edilən neylon qaldırıcı halqa qəfil qırılıb. Halqanın qırılması nəticəsində ağır metal blok aşağı düşərək iki müqaviləli fəhlənin üstünə çöküb.
Yaralılar dərhal Kolkata Xəstəxanasına çatdırılıb. Təəssüf ki, 35 yaşlı fəhlə xəstəxanada dünyasını dəyişib. 41 yaşlı digər fəhlə isə onurğa və əl nahiyəsindən xəsarətlər alıb. Onun vəziyyəti ağır olaraq qiymətləndirilir və hazırda müalicəsi davam etdirilir.
Hadisə ilə bağlı yerli hüquq-mühafizə orqanları tərəfindən təhlükəsizlik protokollarının düzgün tətbiq olunub-olunmaması məsələsini araşdırmaq üçün istintaq başladılıb.
