"Elbdeich" donanmasının genişlənməsini yeni sifarişlərlə sürətləndirir
Almaniyaya məxsus "Elbdeich Reederei" şirkəti Uzaq Şərqdə yerləşən bir gəmiqayırma zavoduna iki 5,100 TEU tutumlu geniş gövdəli konteyner gəmisinin sifarişini verib.
"Seanews.az" xəbər verir ki, gəmilərin 2027-ci ildə təhvil verilməsi planlaşdırılır.
Şirkətin məlumatına görə, bu gəmilər IMO-nun "Tier III" standartlarına cavab verəcək və müxtəlif yanacağa qənaət edən qurğularla təchiz olunacaq. Lakin sifarişin dəyəri və inşaatçı zavodun adı açıqlanmayıb.
Drochtersen şəhərində yerləşən və "United Shipping Companies" (USC) qrupuna daxil olan "Elbdeich Reederei" hazırda 30-dan çox gəmiyə nəzarət edir.
Bu son sifariş Elbdeich Reederei üçün yeni bir mərhələ hesab olunur. Belə ki, bu gəmilər şirkətin indiyə qədərki ən böyük yeni tikinti layihələri olacaq.
