"COSCO Shipping Heavy Industry" Cənubi Çində gəmiqayırma gücünü artırır
Çinin gəmiqayırma nəhəngi "COSCO Shipping Heavy Industry" Cənubi Çində təmir və dəniz mühəndisliyi imkanlarının genişləndirilməsinə 3 milyard yuan (RMB) həcmində sərmayə yatırır.
"Seanews.az" xəbər verir ki, şirkətin Quanqdun əyalətinin Yanzyanq şəhərində həyata keçirdiyi layihə çərçivəsində 400 min tonluq quru dok, 200 min tonluq quru dok, 80 min tonluq üzən dok, eləcə də 7 körpü inşa olunacaq. Bu infrastruktur vasitəsilə iri konteyner gəmiləri, VLCC (çox böyük xam neft daşıyıcıları), VLOC (çox böyük filiz daşıyıcıları) və yüksək texnologiyalı dəniz mühəndisliyi avadanlıqları təmir və modernizasiya ediləcək.
Layihənin istismara verilməsindən sonra illik olaraq təxminən 250 böyük okean gəmisi və dəniz avadanlığı təmir ediləcək və dəyişdiriləcək.
Bundan əlavə, şirkət Cənubi Çində fəaliyyətini genişləndirməklə yanaşı, iyunda Tianjin Sərbəst Ticarət Zonası ilə də böyükmiqyaslı gəmi və dəniz mühəndisliyi avadanlıqlarının təmiri və konversiyası üzrə çərçivə sazişi imzalayıb. Bu razılaşmaya əsasən, "COSCO Shipping Heavy Industry" Tianjin Sərbəst Ticarət Zonasında üç dok və yeddi körpüdən ibarət iri gəmi və dəniz mühəndisliyi təmir-tikinti bazası yaradacaq.
Hazırda şirkətin doqquz orta və iri həcmli gəmiqayırma zavodu mövcuddur.
