Ədən körfəzində gərginlik: bölgədə raket təhdidləri, GPS pozuntuları və pirat hücumları paralel şəkildə artmaqdadır
Ədən körfəzi, Fars körfəzi və Ərəb dənizi boyunca risklər kəskin artıb. Raket hücumları, naviqasiya sistemlərinin pozulması və pirat fəaliyyətləri beynəlxalq gəmiçilik üçün ciddi təhdid yaradır.
"Seanews.az" xəbər verir ki, bu barədə “Dryad Global Maritime Intelligence”in son hesabatında bildirilir.
Sentyabrın 29-da Niderland bayraqlı “MV Minervagracht” gəmisi Ədən körfəzində “Mandab-2” tipli qanadlı raketlə vurulub. Raketin Yəməndəki Husi qüvvələri tərəfindən buraxıldığı bildirilir. ABŞ və İsrailin 2025-ci il ərzində həyata keçirdiyi hava zərbələrinə baxmayaraq, husilər “Maritime Security Transit Corridor” marşrutu boyunca gəmiləri hədəfə almaqda davam edir.
Məlumata görə, İran Husi qüvvələrinə raketlər, pilotsuz uçuş aparatları və ehtiyat hissələri göndərməkdə davam edir. Balıqçı gəmilərindən müşahidə vasitəsi kimi istifadə edilməsi isə hücumların dəqiqliyini artırıb.
Oktyabrın 4-də Qətər GPS siqnal pozuntuları və saxta naviqasiya məlumatları səbəbindən öz sularında bütün dəniz naviqasiyasını dayandırıb. Hadisə “Ras Laffan” da daxil olmaqla əsas enerji ixrac terminallarının fəaliyyətinə təsir göstərib.
Ekspertlər bunu İran–İsrail gərginliyinin artması və bölgədə elektron müharibə risklərinin yüksəlməsi ilə əlaqələndirirlər. GPS və AIS sistemlərindəki saxtalaşdırmalar tankerlərin yanlış koordinatlarda görünməsinə səbəb olub.
Son həftələrdə “Sokotra” adasından 500 dəniz mili məsafədə iki şübhəli insident qeydə alınıb. Ticarət gəmilərinə kiçik sürətli qayıqlarla yaxınlaşan dənizçilər pirat fəaliyyətinə bənzər davranışlar sərgiləyiblər.
Şirkət gəmi operatorlarına Ədən körfəzindən keçərkən yüksək müşahidə rejimi saxlamağı, Fars körfəzində alternativ naviqasiya üsullarından istifadə etməyi, həmçinin BMP5 təhlükəsizlik qaydalarına əməl etməyi tövsiyə edir.
