"HMM" 2,2 milyard dollarlıq konteyner gəmiləri sifariş edib
Cənubi Koreyanın aparıcı gəmiçilik şirkəti "HMM" dəyəri 2,2 milyard ABŞ dollarını aşan yeni nəhəng sifarişlə gündəmə gəlib. Broker mənbələrinin məlumatına görə, şirkət ölkə daxilində 12 ədəd LNG ilə ikili yanacaq sistemli, 14 000 TEU tutumlu konteyner gəmisi sifariş edib.
"Seanews.az" xəbər verir ki, hər bir gəminin dəyəri təxminən 182,5 milyon dollar təşkil edir. Sifariş iki böyük Koreya gəmiqayırma nəhəngi arasında bölünüb: "HD Hyundai" səkkiz, "Hanwha Ocean" isə dörd gəminin tikintisini həyata keçirəcək.
"HMM" hazırda dünyanın səkkizinci ən böyük konteyner daşıyıcısı hesab edilir. Şirkətin donanması yaxın zamanda 1 milyon TEU-luq həddi aşaraq “milyonerlər klubu”na daxil olacaq.
Qeyd edək ki, "HMM" ötən ilin sentyabrında 2030-cu ilə qədər uzanan genişlənmə strategiyasını açıqlamışdı. Plan çərçivəsində şirkət 23,5 trilyon Koreya vonu (təxminən 17,48 milyard ABŞ dolları) həcmində vəsait ayıraraq konteyner donanmasını iki dəfə, tanker və quru yük donanmalarını isə üç dəfə artırmağı hədəfləyir.
