Londonda gəmiçilikdə yaşıl keçidə dair yeni qaydalar müzakirə olunur
Dünyanın aparıcı dənizçilik ölkələri 14 oktyabrda Beynəlxalq Dəniz Təşkilatının (IMO) Londondakı qərargahında yeni “Net-Zero Framework” qaydalarının qəbulunu müzakirə edirlər.
"Seanews.az" xəbər verir ki, sənədin məqsədi gəmiçiliyin fosil yanacaqlardan uzaqlaşmasını və istixana qazı emissiyalarının azaldılmasını təmin etməkdir.
Əgər qaydalar qəbul olunarsa, bu, istixana qazı emissiyalarına tətbiq ediləcək ilk qlobal ödəniş mexanizmi olacaq. Sistemə əsasən, emissiya hüdudlarını aşan gəmilər hər ton karbon qazı üçün ödəniş edəcək, az emissiya yayanlar isə kredit qazanacaqlar.
İldə 11–13 milyard dollar gəlir gətirəcəyi gözlənilən mexanizmdən toplanan vəsait yaşıl texnologiyaların inkişafına yönəldiləcək.
Ekspertlər bildirirlər ki, qaydalar 2027-ci ildə qüvvəyə minə və 2028-ci ildən 5000 tondan yuxarı gəmilərə tətbiq oluna bilər.
Bəzi ekoloji təşkilatlar bioyanacaqlara üstünlük verilməsini tənqid edir və IMO-nu daha miqyaslana bilən yaşıl alternativlərə yönəlməyə çağırır.
