"ClassNK" konteyner gəmilərinin təhlükəsizliyi və yükləmə tutumu üçün yeni standartlar müəyyən edib
Yaponiyanın tanınmış təsnifat cəmiyyəti "ClassNK" konteyner daşımaları ilə məşğul olan tərəflər üçün yeni təlimatlar təqdim edib.
"Seanews.az" xəbər verir ki, bu təlimatlar konteynerlərin yüklənməsi zamanı təhlükəsizliyin təmin olunması və yükün dağılmasının qarşısının alınması məqsədilə hazırlanıb, eyni zamanda yükləmə əməliyyatlarının səmərəliliyini artırmağa yönəlib.
Sənədlər hava proqnozlaşdırılması, gəmi hərəkəti və rəqəmsal əkiz (digital twin) texnologiyaları üzrə ən son biliklərə əsaslanır.
Yeni nəşr olunan “Hava Proqnozlarına Əsaslanan Dəniz Yüklərinin Təhlükəsizliyi üzrə Təlimatlar”, “Yırğalanma əleyhinə qurğular üzrə Təlimatlar” və “Konteynerlərin Yerləşdirilməsi və Bərkidilməsi üzrə Təlimatlar” (3.3-cü buraxılış) hava proqnozlarından istifadə etməklə qısamüddətli səfərlər üçün optimal yükləmə planları tərtib etməyə və yırğalanma əleyhinə sistemlərin təsiri hesabına daha təhlükəsiz və yüksək tutumlu konteyner daşımalarına imkan verir.
