Ukrayna Qara dənizdə neft terminalına xidmət göstərən gəmiyə hücum edib
Ukrayna Qara dənizdə Qazaxıstanın neft ixracı üçün mühüm əhəmiyyət daşıyan CPC (Caspian Pipeline Consortium) terminalında “Nefrit” xidmət gəmisinə hücum edib.
“Seanews.az” bu barədə xarici mediaya istinadla xəbər verir.
Məlumata görə, gəmi terminaldakı yanalma qurğularından birində təmir işlərini başa çatdırmaq üzrə olub və digər qurğuda avadanlıqların dəyişdirilməsinə başlamalı idi. Hücumun planlaşdırılan işləri qeyri-müəyyən vəziyyətə saldığı və CPC-nin gələcək neft yükləmə əməliyyatlarına təsir göstərə biləcəyi bildirilir.
Ukrayna Hərbi Dəniz Qüvvələri gəminin Rusiyanın Soçi limanı yaxınlığında dəniz dronu ilə vurulduğunu açıqlayıb. Bildirilib ki, hadisə zamanı güclü partlayış və tüstü qeydə alınıb.
CPC-nin Qara dənizdə üç yanalma qurğusu var. Şirkət adətən ikisindən istifadə edir, üçüncüsü isə ehtiyat qurğu kimi fəaliyyət göstərir. Terminal Qazaxıstan neftinin dünya bazarlarına çıxarılmasında əsas marşrutlardan biridir.
