Hindistan yeni nüvə sualtı bazası tikəcək
Hindistan Hərbi Dəniz Qüvvələri gələn il Andhra Pradeşdə yeni bazanı istifadəyə verməyi planlaşdırır.
Visakxapatnamdakı Şərq Dəniz Komandanlığının qərargahından 50 km cənubda yerləşən bazada nüvə sualtı qayıqlarının yerləşdirilməsi üçün tunellər şəbəkəsi var.
“Seanews.az” “The Times of India” nəşrinə istinadən xəbər verir ki, bu onlara casus peyklər tərəfindən aşkarlanma təhlükəsi olmadan Benqal körfəzinə daxil olmağa imkan verəcək.
"Varşa layihəsi çərçivəsində Rambilli bazasının birinci mərhələsi demək olar ki, başa çatıb. 2026-cı ildə istifadəyə verildikdən sonra onu mərhələlərlə genişləndirmək və təkmilləşdirmək olar", - deyə mənbə bildirib.
Bu il Hindistan özünün üçüncü 7 min tonluq nüvə enerjili ballistik raket sualtı qayığı "Aridhaman"ı istismara verəcək. Hazırda həm də dördüncü sualtı qayığını inşa edir. Qeyd edək ki, ötən ilin oktyabrında hər biri 9,8 min tonluq iki nüvə hücumu sualtı qayığının tikintisinə icazə verilib.
