Ön yaşayış blokları əsas gəmi dizaynına çevrilə bilər
"Maersk"in bu onilliyin əvvəlində metanolla işləyən konteyner gəmilərində yaşayış blokunu gəminin ön hissəsinə keçirməsi gəmi dizaynı sahəsində dönüş nöqtəsi hesab olunur. Bu yenilik hazırda digər gəmi növləri üçün də aktuallaşır.
"Seanews.az"ın məlumatına görə, bu istiqamətdə "Lloyd’s Register" (LR), "HD Hyundai Mipo Dockyard" (HMD) və "PanOcean" birgə yeni layihə təqdim ediblər. Layihə çərçivəsində "Ultramax" tipli quru yük gəmisində yaşayış blokunun ön hissədə yerləşdirilməsi nəzərdə tutulur.
Eyni zamanda, LR, HMD və Liberiya Beynəlxalq Gəmi və Korporativ Reyestri (LISCR) arasında əldə olunmuş ilkin razılaşma əsasında 50,000 dwt-lik MR tipli tanker üçün ön yaşayış blokuna malik yeni layihə hazırlanıb. Bu dizayn həm külək dəstəkli hərəkət sistemləri, həm də ammonyakla işləyən ikili yanacaq texnologiyası və karbon tutma avadanlıqları üçün əlavə yer təmin edir.
Əvvəllər bu cür dizayn yalnız xüsusi təyinatlı gəmilərdə – ağır yük daşıyan, buz sinifli və ya daxili su hövzaları üçün nəzərdə tutulan gəmilərdə tətbiq olunurdu. Lakin müasir ekoloji tələblər və emissiya məhdudiyyətləri gəmi sahiblərini ənənəvi dizayn həllərinə yenidən baxmağa vadar edir.
Mütəxəssislər hesab edirlər ki, ön yaşayış blokları texnoloji və kommersiya baxımından səmərəliliyi sübut olunduğu halda, gələcəkdə əsas gəmi dizaynlarından birinə çevrilə bilər.
