Gələn il dənizçilikdə rəqəmsallaşma ilə bağlı ciddi inkişaf gözlənilir
Dənizçilik sektorunda rəqəmsal texnologiyaların tətbiqi gələn ildən etibarən sürətlə artacaq.
"Seanews.az" bu barədə gəmi performansı və səmərəliliyinə fokuslanan "Smart Ship Hub" platformasına istinadən xəbər verir.
Platformanın məlumatına görə, gəmi sahibləri və operatorlar artıq qeyri-müəyyən vədlərdən deyil, ölçülə bilən fayda və investisiya gəliri təqdim edən həllərlə maraqlanırlar. Rəqəmsallaşma vaxt itkisinin azalması, çeviklik, vasitəçilərin sayının minimuma endirilməsi və məlumat əsaslı proseslər hesabına həm gəlir, həm də xərclər baxımından real üstünlüklər yaradır.
2026-cı ildə xüsusilə süni intellekt (AI), yüksək tezlikli avtomatik sensor məlumatları, avtomatlaşdırma, rəqəmsal əkizlər və vahid rəqəmsal platformalar gəmi əməliyyatlarında, limanlarda, tədarük zəncirində və texniki xidmət proseslərində daha geniş tətbiq olunacaq. Köhnə gəmilər üçün də uyğunlaşdırıla bilən minimal investisiya ilə quraşdırılan sensor həlləri bu texnologiyalarla birlikdə sektorda məlumata çıxışı daha əlçatan edəcək.
"Smart Ship Hub"-ın baş icraçı direktoru Joy Basu bildirib ki, sektor artıq rəqəmsal alətlərin real əməliyyat dəyərinə fokuslanır. Onun sözlərinə görə, AI dəstəkli sistemlər təhlükəsizlik, normativlərə uyğunluq, texniki xidmət və kommersiya qərarlarının qəbuluna inteqrasiya olunacaq.
Basu vurğulayıb ki, 2026-cı il rəqəmsallaşmanın pilot layihələrdən çıxaraq genişmiqyaslı və əlavə dəyər yaradan transformasiyaya çevrildiyi il olacaq.
Bu proseslər gəmi operatorlarından tutmuş limanlara və sığorta şirkətlərinə qədər dənizçilik ekosisteminin bütün iştirakçıları üçün səmərəliliyi artıracaq və sektorda rəqabət üstünlüyü yaradacaq.
