“Disney Adventure” Panama kanalından keçən ən böyük kruiz gəmisi olub
“Disney Cruise Line” şirkətinə məxsus “Disney Adventure” kruiz gəmisi Panama kanalından keçən ən böyük kruiz gəmisi kimi rekord müəyyənləşdirib.
“Seanews.az” xəbər verir ki, 208 min ümumi tonnaja malik olan gəmi 200 min tondan artıq ümumi çəki ilə kanaldan keçən ilk kruiz gəmisi olub. Panama Kanal Administrasiyasının məlumatına görə, bu göstərici indiyədək rekordçu olan “Norwegian Bliss” gəmisindən təxminən 40 min ton çoxdur.
Uzunluğu 342 metr, eni isə 46,4 metr olan gəminin keçidi xüsusi koordinasiya tələb edib. “Neopanamax” şlyuzlarında gəmi hər iki tərəfdən məhdud məsafə ilə hərəkət edib.
“Disney Adventure” 6 700-dən çox sərnişin və 2 500 nəfərlik heyət üçün nəzərdə tutulub. Gəmi hazırda yerləşmə səfəri çərçivəsində hərəkət edir və martın 10-da Sinqapurdan ilk kommersiya səfərinə çıxacaq.
Panama kanalı rəhbərliyi bildirir ki, hazırkı mövsümdə kanaldan 40-a yaxın iri kruiz gəmisinin keçidi gözlənilir.
