Birinci Dünya müharibəsindən qalan Britaniya hərbi gəmisinin xilasına çalışılır
Birinci Dünya müharibəsində alman sualtı qayıqlarına qarşı istifadə olunmuş “HMS Saxifrage” hərbi gəmisinin gələcəyi təhlükə altındadır. Gəminin hazırda dayandığı doku tərk etməsi tələb olunduqdan sonra onun qorunması üçün kampaniyaya başlanılıb.
“Seanews.az” xəbər verir ki, “Q-ship Society” təşkilatı 1917-ci ildə inşa edilən və 1918-ci ildə xidmətə qəbul olunan gəmini xilas edərək muzeyə çevirməyi planlaşdırır.
Gəmi müharibə zamanı adi ticarət gəmisi kimi maskalanaraq alman sualtı qayıqlarını tələyə salmaq üçün istifadə edilən Q-gəmilər sinfinə aid olub. O, 4 düymlük və 12 funtluq toplarla silahlandırılmışdı.
Müharibədən sonra gəmi “HMS President” adlandırılıb və uzun illər Britaniya Kral Hərbi Dəniz Könüllülər Ehtiyat Qüvvələrinin təlim gəmisi kimi xidmət edib. O, 2016-cı ildə Londondakı dayanacağından çıxarılaraq Çatem limanına köçürülüb.
Hazırda təşkilat gəmi üçün yeni daimi dayanacaq tapmaq, bərpa işlərini maliyyələşdirmək və onu Birinci Dünya müharibəsində Q-gəmilər və alman sualtı qayıqlarının tarixini əks etdirən muzeyə çevirmək məqsədilə vəsait toplayır.
