ASCO-nun Təlim Tədris Mərkəzi fəaliyyətini uğurla davam etdirir
11 ildir ki, fəaliyyət göstərən "Azərbaycan Xəzər Dəniz Gəmiçiliyi” QSC-nin (ASCO) Təlim Tədris Mərkəzində (TTM) ötən dövr ərzində proseslərin təkmilləşdirilməsi, tədris proqramları və dərs vəsaitlərinin müvafiq standartlara uyğunlaşdırılması, ən əsası dənizçilərin sertifikatlaşdırılması üçün təlimlərin keçirilməsi, onların təcrübi məşğələləri və qiymətləndirilməsi işləri uğurla davam etdirilib.
Təkcə 2024-cü ildə TTM-də 6574 nəfər dinləyici üçün 606 kurs keçirilib. Dinləyicilərdən 28 nəfəri xarici vətəndaş olub. Təlimlər iştirakçıların aid olduğu ölkələrə uyğun Azərbaycan, ingilis və rus dillərində təşkil edilib.
Ötən il audit nəticəsində daha dörd yeni təlimin TTM-də keçirilməsi təsdiqlənib. Belə ki, Mərkəzdə “Sürətli olmayan xilasedici qayıq və sallar üzrə mütəxəssis” təlimi üzrə təlimatçıların hazırlığı, “DP Təkmilləşdirmə və Bacarıqların Qiymətləndirilməsi”, “Dinamik mövqe saxlama sisteminə texniki xidmət (NI akkreditasiyalı)” təlimi “DP operatorlarının təcrübə proqramı”, “Offşor tanışlıq“ kurslarının tədrisinə başlanılıb.
Qeyd edək ki, hazırda ASCO-nun Azərbaycan Dövlət Dəniz Akademiyasının tərkibində fəaliyyət göstərən Təlim Tədris Mərkəzi 31 yanvar 2014-cü ildə yaradılıb. Mərkəz müasir auditoriyalardan ibarət olmaqla, həmçinin trenajor, üzgüçülük hovuzu və dənizçilik avadanlıqları ilə təchiz edilib.
Təlim Tədris Mərkəzində keçirilən təlimlər Azərbaycan Respublikası Rəqəmsal İnkişaf və Nəqliyyat Nazirliyi yanında Dövlət Dəniz və Liman Agentliyi və Amerika Gəmiçilik Bürosu (American Bureau of Shipping) tərəfindən akreditasiya olunub.
