Filippində bərə yanğınında ölənlərin sayı 5-dən 76-ya yüksəlib
Filippində “June Aster” bərəsində baş verən yanğın nəticəsində ölənlərin sayı 76-ya yüksəlib, 13 nəfər isə hələ də itkin sayılır. Hadisə zamanı gəmidə olan 132 nəfərdən yalnız 43-ü sağ qalıb.
“Seanews.az” xəbər verir ki, bərə ötən çərşənbə günü Maniladan Busuanqa adasındakı Koron limanına yola düşüb. Həmin gün saat 18:45 radələrində Marsilla şəhəri yaxınlığında, sahildən təxminən bir dəniz mili məsafədə gəmidə partlayışın ardınca güclü yanğın baş verib.
Hazırda sahilə oturmuş gəminin qalıqlarında axtarış-xilasetmə işləri davam etdirilir. Filippin Milli Polisinin kriminal laboratoriyasının məlumatına görə, 71 meyit tamamilə yanıb. Qalıqların kimliyinin müəyyənləşdirilməsi üçün DNT analizlərindən istifadə olunur və prosesin aylarla davam edə biləcəyi bildirilir.
